Aofgeloupe zondag is ein vaan de lede vaan ‘t Garderizzjemint De Kachelpiepers oetgerope es Stadsprins vaan Groet-Mestreech. 

Kachelpieper Han van den Akker woort Stadsprins Han d’n Ierste.

Gruuts zien veer op ‘t feit tot -in zjubileijaor vaan De Tempeleers- eine oet eus midde ‘t Vastelaovendvierend Volk vaan eus stad veur zal goon op weeg en tijdens de zwoer mer plezerege daog vaan Vastelaovend 2012.

In ‘t verleie zien aajd leie vaan De Kachelpiepers al oetgekoze um Stadsprins te weure, meh de nuie Stadprins is lid vaan wat opins zíén Garderizzjemint is gewore.
Daoneve zien in de loup vaan 2011 drei aajd Stadsprinse mèt goon dreie es muzikant, boedoor ‘t aontal aajd Hoeglösteghede op veer is gekoume
De nuie Stadsprins is sinds augustus touwgetrooje tot eus Korps es trombonis. Heer heet dat same mèt ziene zier gooje vrund Benoit Schyns gedoon.

Hiel biezunder is ‘t feit tot heer aofgeloupe zaoterdag nog gewoen mèt ‘t Korps is oetgetrokke nao Sint Pieter bij ‘t oetrope vaan de prins vaan de Mosasaurusse present te zien. Heer zouw zondag ouch gewoen mèt us mètgoon. Wie aanders heet dat oetgepak.

Volgens de traditie vaan de Kachelpiepers kin allein de Stadsprins nui Kachelepiepers instalere. Boedoor ze ouch zien opgenome in ‘t Garderizzjemint vaan de Stadprins. Um die traditie ier aon te doen en ‘t protocol vaan De Tempeleers neet te doorbreke waor d’r mer ein meugelekheid: de Stadsprins moos ziechzelf instalere. Dit is op maondag 23 januari in ‘t bijzien vaan de Prinses, de kinder, zien ma en sjoenawwers oonder groete belangstèlling gebäört. E manjefiek momint veur ederein um mèt te make.

‘t Garderizzjemint De Kachelpiepers feliciteert Stadsprins Han d’n Ierste, Prinses Ingeborg, Fieneke, Pol, Marilène en Loeke en wins hun ‘ne prachtege Vastelaovend touw.

‘t Garderizzjemint De Kachelpiepers